Өнеге
Теннистен Америкада өтіп жатқан Индиан-Уэллс турнирінде осы бір сүйкімді қазақ қызы бүкіл көрермендерді таң қалдырды: ол аталған бәсекеде отандасымыз Зарина Диасты қолдап, Қазақстанның көк туын жоғары көтеріп, бүкіл көрермендерді тәнті қылды.
Кейіннен белгілі болғандай, бұл қыздың есімі Айжан екен. Американың алыстағы басқа қаласынан Заринаны қолдау үшін ұзақ жол жүріп, Қазақстан туын өзімен бірге ала келген.
Естеріңізге сала кетсек, АҚШ-тың Калифорния штатындағы Индиан-Уэллс қаласында өтіп жатқан турнирдің үшінші айналымында қазақтың талантты теннисші қызы Зарина Диас пен атақты америкалық Серена Уильямс кездескен болатын. Бірақ «Үлкен дулыға» жүлдесін 15 рет жеңіп алған «қара пантера» Заринаны екі сетте жеңіп, жарысты жалғастырды.
Бірақ бір қызығы: сол теннис додасын тамашалаған қазақстандық жанкүйер Ербол Қабыловтың айтуынша, бүкіл телекамера атаулы қазақтың көк байрағын төбесіне көтерген қызды аңдумен болған көрінеді. Көрермендер мен турнир ұйымдастырушылары оның кім екенін білуге ынтық болып, бір-бірінен сұраумен болды деседі.
«Қызық» дейтініміз: әлемнің бірінші ракеткасы Серена Уильямстің өнерін тамашалауға келген көп-көп көрерменнің жалғыз қазақ қызына кілт бұрылуы. Енді қараңызшы: анау бір алыстағы америкалықтар Серенасын «әдірәм қалдырып», біздің Айжандай қарапайым қызға ынтық ықылас аударуының сыры неде деп ойлайсыз? Себебі, АҚШ азаматтары қашанда отансүйгіштік қасиетті құзар биіктіктегі құндылық санайды. Олардың әрқайсысының қойнында әлдеқандай жағдайға қажет болады деген оймен бір-бір қызыл жолақты АҚШ байрағы бүктеулі жүреді. Сол себепті де олар көк ту көтерген қазақ қызына қошаметпен қызыға қараған шығар.