«Общественная позиция»
(проект «DAT» №15 (379) от 20 апреля 2017 г.
Еділ Мәкен:
Осы жолы бізге үлкен және майлы сүйек тасталды, демек, ұрының мақсаты зор. Сүйек кеміреміз деп, қорадағы малдан ғана емес, қора тұрған жерден айырылып қалмасақ болды…
Уақыт тауып, Ресей саясаткерлерінің латын әрпіне байланысты ойларын тыңдадым. Қортынды: оларға вагондап тұз, арқан және сабын апаруға болады…
Назарбаевтың ерең еңбегінің, көрегендігінің, салиқалы саясатының арқасында Қазақстанның әр өңірінде өз Венециялары пайда болды…
Әбдіғани Байшора:
– Сен латыншамен не бүлдірейін деп жүрсің, кәрі қақпас?!
– Жәй әншейін, Вован Вованич, ұлтшылдардың құлағына лапша іліп жіберейін дегенім ғой…
Ғалия Әженова:
Рухани жаңғыру ұлтқа ауадай қажет. Ол ертеңге деген сенімнен басталады, егер: бүгін әділетті сот болса, оған ешкім, елбасы да ықпал ете алмаса; үкімет әлеуметке жауапкершілік пен қараса; ер азаматтар өз еңбектерімен отбасын асыраса; жетім мен кедей көшеде қол жайып жүрмесе; ешкім еш жерде заңды төлем үшін «сыйлық» сұрамаса, оны беруге мәжбүрлемесе; ауру адам дәрігерден ем тапса; мұғалім мен оқушы тек сабақты ойласа… сеніммен жол тартамыз рухани жаңғыруға!
Гүлмира Әжмұратова:
Депутаттарды – миллионмен, бізді – латынмен ауыздарымызды майлап, жерді ысырып жіберіп жүрмесін…
Асылхан Мамашұлы:
Бір мақаласы бір атым насыбайға тең елбасым-ай! Біреудің көңілі қалып, біреу мәз кешелі бері. Атар көп болсын!
Ержан Тәліп:
Мақаланы бір шолып шықтым. «Өйтуіміз керек», «бүйтуіміз керектен» көз сүрінді.
«Өйту керек», «бүйту керектігін» біз де білеміз ғой. Пыросты, қалай істеу керектігін білмей жүр емеспіз бе?
Не ғой, қарыштап дамып, дамудың даңғыл жолында келе жатқанымызды білеміз. Бірақ қай жерде келе жатқанымызды білетін, айтатын бір мұсылман бар ма?
Ұлттық кодты таптыңдар ма, қазақтар? Кодымыз қай жерімізге жасырылған екен өзі?
Су тасқынынан зардап шеккендерге фыбы халқы көмек ретінде екі миллион лайк пен бір миллион «Алла жар болсын!» деген коммент жинап беріпті.
Күлесің бе, жылайсың ба? Лайк пен комменттен басқа не келсін қолымыздан. Ал орны жайлы, мұрты майлы, миллион теңге айлығы бар депутаттар үнсіз.
Алла жар болсын қазақтарға! Құдай мен үкіметтің назары түссе – көрсін. Үкімет бастамашы болып, мұғалімдердің бір күндік жалақысын аудартатын шығар да… Тілекшіміз.
Жарылқап Қалыбай:
2025 жылы бұл президент өз орнында бола ма, жоқ па? Оған дейін кім бар, кім жоқ?! Сондықтан латынға көшеміз деп, босқа алаөкпе болмаңыздар. Егер елбасы аман болса, бұл ұсыныс та 2030 және 2050 сияқты ешқашан орындалмайтын арман болып қала береді.
Қуандық Шамахай:
Қар суының салдарынан тасқын болып жатқан өлкеге жалақысы көбейген бір топ депутат барып, селге батып кетіпті дейді. Оларды жедел құтқаруға қаладан арнайы жасақ келсе, ауыл тұрғындары әлгілердің бәрін әлдеқашан жерлеп тастаған көрінеді.
– Бұларың не, бәрі тұншығып өлді ме? Ішінара тірілері болған шығар? – десе, су басқан ауыл тұрғындары:
– Бәрі де «тіріміз» деп айғайлап-ойбайлаумен болды ғой. Бірақ олар қашан шындықты айтушы еді? Сөздеріне сенбедік, көміп тастадық… – деген екен.
Пікірлер «Фейсбук» желісінен алынды